بسبب أسماء أصناف محلات بلبن المتخصصة في صناعة الحلوى يشهد مواقع التواصل الاجتماعي جدلاً واسعاً حول أسماء بعض أصناف الحلويات التي تقدمها محلات “بلبن”، حيث يرى البعض أن هذه الأسماء غير لائقة وغير مناسبة للمجتمع مستنكرين بعض الأسماء التي يرون أنها خادشة للحياء وتسيء إلى الذوق العام.
حملة مقاطعة تطالب بتغيير أسماء حلويات “بلبن
وطالب رواد مواقع التواصل الاجتماعي السوشيال ميديا بتدشين حملة لمقاطعة محلات “بلبن”
“احترموا الناس” تستهدف محلات “بلبن”
وأطلق رواد مواقع التواصل الاجتماعي حملة تحت عنوان “احترموا الناس”، مطالبين محلات “بلبن” بتغيير بعض الأسماء التي يرون أنها غير مناسبة.
تساؤلات حول الأبعاد الأخلاقية والقانونية لأسماء أصناف بلبن
أثارت أسماء بعض أصناف الحلويات التي تقدمها محلات “بلبن” تساؤلات حول الأبعاد الأخلاقية والقانونية لهذه الأسماء، وهل تتجاوز حدود اللياقة العامة؟
هل تتجاوز أسماء حلويات “بلبن” الخطوط الحمراء؟
يرى البعض أن بعض الأسماء التي تحملها قائمة منتجات محلات “بلبن” تتجاوز الخطوط الحمراء وتسيء إلى العادات والتقاليد والعرف المجتمعي.
سلسلة محلات بلبن تصدر بيان رسمي لتوضيح أزمة اختيار أسماء الأصناف
بخصوص موضوع لهاليبو يح يح … والله كنا هنكتب بيان بخصوص موضوع الاسامي اللي منتشر بقالة يومين وبغض النظر بقي هي حملة ممنهجة ولا صدفه حبينا نقول كلمتين بالبلدي ومن القلب ومن غير بيانات ورسميات
–
أولاً
الحمد لله رب العالمين علي النعمة الكبيرة اللي احنا فيها وتوفيق ربنا الكبير لينا في كل الدول العربية اللي فتحنا فيها واللي كنا وجهة مشرفة فيها وبنفخر اننا براند مصري ١٠٠٪
–
ثانياً
احنا محل حلويات يا جماعة يعني الموضوع في الحقيقة بسيط جداً بس عشان النجاح والفروع الكتير فا تلاقي الكلام عننا كتير الحمد لله لكن لما تلاقي مطعم عنده فرع ولا اتنين مسمي سندوتش الفياجرا ده اللي عادي خالص طبعاً ومفيهوش افساد للذوق العام وحضرتك بتروح تطلبه عادي
–
ثالثاً
الاسامي عندنا من باب التهريج البحت ومعظمها بيكون صدف مرتبطة ب حاجات حصلت اثناء التجارب ( من وجهة نظرنا اللي ممكن متكونش مقنعة بالنسبالك فا مثلاً فكرة اسم المنتج اللي عليه الضجة كان هيتسمي لهاليبو بس في الاول علي اساس ان العجين سخن من بره وده مش العادي في الايس كريم بعد كده اتضاف كلمة يح يح علي اساس انه ساقع من جوه ) وفعلا الموضوع بالنسبالنا كان تهريج تماماً مش مقصود بيه اي حاجة كنا شايفينة اسم مضحك افيه زي قوليلي يا محاميحو كده (الموضوع بسيط وتافه واتجاه كوميدي)
–
رابعاً
بجد كل اللي بيحصل وبنشوفه في التلفزيون وعالنت واسامي منتجاتنا هي اللي بتفسد الذوق العام ؟
اسامي منتجاتنا عاملة ازمة اخلاقية لدرجة انك بتدعو لمقاطعة مكان اكل عيش ليه اكتر من 70 فرع في مصر وبيشتغل في ارباب اكتر من 20 الف اسرة ؟
كان ممكن تكتفي علي فكرة انك متطلبش المنتج بس لأن في حاجات اخلاقية كتير قوي محتاجين نتكلم فيها اهم من اسم منتج ايس كريم في السوق مش علي هواك
لكن تطالب بمقاطعة مكان اكل عيش الناس دي كلها ؟ والله حاسس ان الموضوع مش منطقي حببتين تلاتة
–
خامساً
احنا اسفين ل اي حد شايفنا غلطانين وحاسس ان احنا فعلاً اللي عاملين ازمة بسبب اسم لهاليبو
من النهاردة قررنا تغيير اسم المنتج خالص لاي اسم يرضي الجميع و يكون في الصالح العام وممكن نلغي المنتج خالص عادي
اخيراً
احنا بنتقي ربنا في اكل عيشنا والحمد لله قصة نجاح مصرية في 8 دول عربية ب اكتر من 180 فرع واكتر من 40 الف مصري شغال في المجموعة دي سواء داخل مصر أو في الخارج واه عندنا اخطاء تشغيلية ومشاكل شغالين علي حلها وبنسمع لكل النقد وبنحاول نحل كل المشاكل و الحمد لله مستوانا في تحسن مستمر في كل حاجة وبنشتغل علي كل اخطائنا وبنتعلم منها ومش بنكابر وعشان كده الحمد لله ربنا بيكرمنا
ولسا قدامنا كتير وعندنا خطة تطوير وتحسين لكل حاجة وبنشكر ربنا ومن بعده كل الناس اللي بتساندنا وكل اللي بينتقدنا نقد بناء بيساعدنا اننا نكون احسن ..
عارفين ان الكلام طول بس كان لازم نفضفض بنعتذرلكم مره تانية
ونتمني محدش يكون زعلان مننا
تعليقات المواطنين على وسائل التواصل الاجتماعي
مصطفى عادل كتب
– بلبن زودتها والموضوع بقى منتهى قلة الذوق والادب !!
موضوع إن بنت محترمة بنت ناس أو أي امرأة مهما كانت تروح لمحل زي ( بلبن ) تقوله عاوزه واحد ملهلب قوي يح يح يح……. او قشطوزة وغيرها !!!
دي اسمها بدون تزويق قله عقل وادب و قلة حياء منكم و من إدارة المكان!!
وانا رجعي ومتخلف واللي عايزين تقولوه قولوه .. أنا بناتي مانعهم عنه او حتى فكرة قبول او استخدام الالفاظ الوقحة دي
لأنه مينفعش بنت مهما كان سنها وتربيتها تقف قدام شاب تقوله كده !!!
شيء في منتهى الخجل وقلة الذوق والتربية !!
– أنا أهو راجل أخجل من اقول اسماء اصناف زي الي عندكم وانا بطلب .. ما بالك بـ بنت او امرأه
انا مليان عيوب فوق ماحد يتخيل .. ولو الحياء والغيرة على بناتي او بنات الناس في انهم يعتادوا قلة الادب .. رجعية وتخلف
اعتبرني رجعي ومتخلف يا اخي
تحديث بسيط : الشركة عملت بيان اعتذار ولما علقت عندهم لاتهامي باني ممول ومأجور عملولي بلوك!!!
فا اتهام الناس بالباطل .. اعتقد الرد القانوني بيكون اسلم حل
صفحة “حلمية الزيتون” على فيسبوك كتبت :
“مقاطعة بلبن 🚫🚫🚫 ..بلبن زودوها والموضوع بقى منتهى قلة الذوق والأدب الصراحة !! .. موضوع إن بنت محترمة بنت ناس أو أي امرأة مهما كانت تروح لمحل زي ( بلبن ) تقوله عاوزه واحد ملهلب قوي يح يح يح.. أو قشطوزة وغيرها !!!.. دي اسمها بدون تزويق قله عقل وادب و قلة حياء منكم و من إدارة المكان!!.
اسعار القشطوطه من بلبن
قشطوطة كراميل 45 جنيه.
قشطوطة مانجا 60 جنيه
قشطوطة مكسرات 65 جنيه.
قشطوطة لوتس 65 جنيه.
قشطوطة قشطه 45 جنيه.
قشطوطة رز بلبن مكسرات 65 جنيه.
قشطوطة رز بلبن لوتس 65 جنيه.
قشطوطة رز بلبن مانجا 60 جنيه.
قشطوطة رز بلبن كريمة 45 جنيه.
قشطوطة سوبر لوكس 90 جنيه.
الايس كريم واسعاره
كوب ايس كريم صغير 15 جنية
كوب ايس كريم كبير 25 جنية
كوب ايس كريم صغير الفستق وبندق 30 جنية
كونوايس 25 جنية
كونو ايس فستق 40 جنية
مسحب 70 جنية
مسحب قشطوطة 65 جنية
مسحب ارز قشطوطة 70 جنية
مسحب ٢ قطعة 25 جنية
طعمية ايس حليب 40 جنية
طعمية ايس فستق 65 جنية
